Xorazm viloyatining qadimiy va betakror shahri Xivada milliy an’ana va zamonaviylik uyg‘unligini o‘zida mujassam etgan “Cho‘girma Flash Mob” xalqaro festivali yuqori saviyada va ko‘tarinki ruhda tashkil etildi. Mazkur festival Oʻzbekiston Respublikasi Turizm qoʻmitasi tashabbusi bilan o‘tkazilib, hududning boy madaniy merosini keng targ‘ib etishga xizmat qildi.

   Festivalda Xiva turizm va madaniy meros texnikumi talabalari ham faol ishtirok etib, turli madaniy chiqishlar, sahna ko‘rinishlari hamda jamoaviy flash mob dasturlarida qatnashdilar. Bu esa yoshlarning ijodiy salohiyati va milliy qadriyatlarga bo‘lgan hurmatini yana bir bor namoyon etdi.

   Tadbir davomida festival hududi rang-barang milliy liboslar, milliy kuy-qo‘shiqlar va raqslar bilan yanada jonlandi. Nafaqat mahalliy aholi, balki xorijiy sayyohlar uchun ham unutilmas taassurotlarga boy muhit yaratildi. Har bir tashrif buyuruvchi o‘zini haqiqiy bayram muhitida his etdi.

   Xorazmning qadimiy va o‘ziga xos bosh kiyimi — cho‘girma namoyishlari festivalning eng diqqatga sazovor qismi bo‘ldi. Turli dizayn va uslublarda tayyorlangan cho‘girmalar milliy merosimizning boyligi va o‘ziga xosligini yaqqol ifoda etdi. Hunarmandlar tomonidan ushbu bosh kiyimning yaratilish jarayoni, uning tarixiy ildizlari va ahamiyati haqida ham batafsil ma’lumotlar berildi.

   Shuningdek, festival doirasida hunarmandchilik ko‘rgazmalari, milliy taomlar yarmarkasi hamda turizm xizmatlari taqdimotlari tashkil etilib, tashrif buyuruvchilarga hududning turizm salohiyati keng namoyish etildi. Turizm sohasidagi tashkilotlar o‘z xizmatlarini taqdim etib, mehmonlar bilan yaqindan muloqot o‘rnatdilar.